35 þúsund kjósa í fyrsta sinn

Hagstofan hefur gefið út kjörskrárstofn vegna forsetakjörsins næstkomandi laugardag. Alls eru 213.553 kjósendur á kjörskrá samkvæmt stofninum, 107.119 konur og 106.434 karlar. Sveitarfélög semja endanlega kjörskrá upp úr kjörskrárstofni Hagstofunnar. Í endanlegri tölu kjósenda á kjörskrá, sem birt verður í skýrslu um kosningarnar, verður tekið tillit til tölu látinna og þeirra sem fá nýtt ríkisfang eftir að kjörskrárstofnar voru unnir, svo og breytinga sem verða á kjörskrá vegna leiðréttinga. Við forsetakjör 29. júní 1996 voru 194.705 kjósendur á kjörskrá og nemur fjölgunin 18.848 eða 9,7%. Þá varð breyting frá kjörskrárstofni til endanlegrar kjörskrár sú að skráðum kjósendum fækkaði um 79. Kjósendur með lögheimili erlendis eru 8.860 eða 4,1% kjósenda og hefur þeim fjölgað um 1.094 frá síðasta forsetakjöri eða um 14,1%. Kjósendum með lögheimili hér á landi hefur fjölgað um 17.754 eða 9,5%. Þeir sem vegna aldurs fá nú að kjósa í fyrsta sinn við forsetakjör eru 34.549 eða 16,2% kjósenda.