Starf auglýsingateiknara

<B>STARFIÐ:<P> Í dag starfa um 120 manns sem grafískir hönnuðir á Íslandi. Starfið felst í að sjá um auglýsingagerð, hönnun umbúða, plakata, bæklinga, tímarita, dagblaða, bókakápa, vefsíðna og að búa til efni í leiknar auglýsingar í sjónvarpi. Flestir vinna á auglýsingastofum en einnig eru margir í föstu starfi við auglýsingagerð stórfyrirtækja. <B>NÁMIÐ:<P> Til að verða auglýsingateiknari sækir maður nám í grafískri hönnun sem fer fram í Listaháskóla Íslands eða sambærilegum skólum erlendis. Grafísk hönnun er hönnunarsvið sem byggir á ævafornum grunni ritlistar og prenthefðar, sem hefur sprungið út á 20. öld í mjög fjölbreytt svið framsetningar á efni á frjóan og skipulegan hátt. Nám í grafískri hönnun er nám í framsetningu á upplýsingum á myndrænan hátt fyrir fjölmiðlagreinar. Umsækjendur verða að velja á milli þess hvort þeir leggja áherslu á prent eða skjámiðla. Eftir BA-gráðu er greið leið út á vinnumarkaðinn, en einnig eru víðtækir möguleikar á að auka þekkingu og sérhæfingu með framhaldsnámi á háskólastigi, t.d. í hreyfimyndagerð, stjórnun hönnunarverkefna eða bókahönnun. Námið tekur þrjú ár og skólagjöld fyrir skólaárið 2004-2005 eru 165.000 krónur. <B>INNTÖKUSKILYRÐI:<P> Rétt til að sækja um nám hafa þeir sem lokið hafa stúdentsprófi, sambærilegu námi eða námi af listnámsbrautum framhaldsskólanna. Þeir sem sækja um eftir að hafa lokið námi af listnámsbrautum verða að auki að hafa lokið sex einingum í íslensku og 12 einingum í erlendum tungumálum eða samtals 123 einingum. Umsækjendur þurfa að vera hæfileikamiklir og hugmyndaríkir. Þeir sem ekki uppfylla þessar kröfur koma þá aðeins til greina, að þeir geti sýnt fram á einstaka, óvenjulega hæfileika á því sviði sem þeir sækja um og hafi að baki annað nám eða störf sem að mati viðkomandi deildar getur talist jafngildi þess náms sem á vantar. <B>ATVINNUHORFUR:<P> Vinna í auglýsingageiranum er afar næm á breytingar í þjóðfélaginu. Þegar góðæri er ríkur starfsmannafjöldi auglýsingastofanna upp, en um leið og samdráttar er vart fækkar starfsfólkinu. Fjöldi auglýsingastofa hefur farið minnkandi með árunum og æ fleiri grafískir hönnuðir hafa ráðið sig til stærri fyrirtækja í auglýsingagerð. Þá er talsvert um einyrkja í faginu. <B>LAUN- OG VINNUTILHÖGUN:<P> Vinna á auglýsingastofum er oftast nær dagvinna, en þó koma tímar þar sem vinnutarnir ná fram yfir dagvinnutímann og langt fram á kvöld. Byrjunarlaun eru frá 250 þúsundum en auglýsingateiknarar með víðtæka þekkingu og reynslu fá allt upp í 600 þúsund í mánaðarlaun. Stéttarfélag grafískra hönnuða er Félag grafískra teiknara sem er sameinað Félagi bókagerðarmanna.