Geggjað að vera upp á hálendinu

"Þetta er heimsins fallegasti staður og við hjónin reynum að fara þarna eins oft og við getum. Skálinn tekur um 80 manns í rúm alls og er þar bæði olíukynding og rafstöð.

Í mars síðastliðnum fórum við í kvennaferð í skálann, 60 konur og enginn karlmaður með. Við fórum á jeppunum okkar með 38 tommu dekkjum og þurftum, eða kannski öllu heldur fengum, að sjá um allt sjálfar. Þegar mennirnir okkar eru með erum við meira svona eins og prinsessur og fáum sjaldan að keyra. Annars eru margar konur í klúbbnum og þeim fjölgar jafnt og þétt."

Agnes á Nissan Patrol-jeppa ásamt manninum sínum en nennir ekki að keyra hann innanbæjar. "Hann er svo stór og óþægilegur í bílastæðum," segir hún. En hún hefur þeim mun meira gaman af því að fara upp á hálendið og í Setrið. "Kyrrðin er svo mikil, þarna er bara einn skáli og fjöllin allt um kring og manni finnst maður vera aleinn í heiminum."