Starfsmenn Fimleikasambandsins ruku á dyr: „Fyllir mann vonleysi að reyna að berjast í þessu“

Það eru ekki allir sáttir við úthlutun afrekssjóðs í dag. Starfsfólk fimleikasambandsins rauk út af fundinum í dag um leið og formlegri dagskrá lauk. Framkvæmdastjórinn segist fyllast vonleysi við að sjá þeirra skerf af kökunni.

Fimleikasamband Íslands með sína 13.000 iðkenndur og landslið sem náðu mjög góðum árangri jafnt í áhalda- og hópfimleikum á síðasta ári fékk rétt tæpar átta milljónir króna úr Afrekssjóðnum. Framundan á árinu eru nokkur stórmót en fimleikarnir fengu minna en knattspyrnusambandið og golfsambandið svo dæmi séu tekin.

Sólveig Jónsdóttir, framkvæmdastjóri Fimleikasambandsins, og tveir kollegar hennar hjá sambandinu voru ekki í miklu stuði þegar blaðamannafundinum í laugardalnum lauk í dag og voru fljótar að láta sig hverfa. Sólveigu var mikið niðri fyrir þegar íþróttadeild 365 hitti hana á skrifstofu FSÍ skömmu eftir fundinn.

„Það er rétt, ég var ekki nógu sátt. Ég held samt sem áður að það sé hlutverk okkar allra að vera ekki alveg nógu sátt því við viljum berjast fyrir einhverju meiru,“ sagði Sólveig í viðtali við íþróttadeild eftir fundinn í Laugardalnum í dag.

„Þetta eru vonbrigði. Við erum mögnuð hreyfing á Íslandi og stærsta kvennahreyfingin og að eiga ótrúlega sigra en einhvernveginn náum við því ekki inn til ÍSÍ og Afrekssjóðsins. Það fyllir mann vissu vonleysi þegar maður er að berjast í þessu.“

Tímamóta árangur

Sólveig tekur fram að hún sé ekki að kasta rýrð á aðrar íþróttir en bendir á að í fimleikum eru ekki beint svokölluð stórmót sem er stór breyta sem skiptir miklu máli þegar kemur að úthlutunum eins og sést á upphæð handboltans og körfuboltans.

„Alþjóðasambandið okkar stillir þessu ekki þannig upp heldur er lokamótið inn í mótinu sjálfu. Við fórum á síðasta ári með fjögur landslið á Evrópumót í hópfimleikum og þau komust öll á lokamót. Þau náðu öll á verðlaunapall en það virðist ekki komast til skila,“ sagði Sólveig.

öLandsliðið okkar í áhaldafimleikum komst líka á Evrópumót, kemst á lokamótið og endar þar í fjórtánda sæti. Þetta er tímamóta árangur sem við erum að ná. Miðað við árangurinn sem við erum að ná á öðrum lokamótum þá skilur maður þetta ekki alveg.“

Skýrari reglur

Sólveig á erfitt með að sætta sig við að fá minna en knattspyrnusambandið sem starfar í allt öðruvísi og arðvænna umhverfi en aðrar íþróttir.

„Við erum að fá minna en samband sem greinir sínum keppendum bónusa. Þá fer maður að velta fyrir sér hvort afrekssjóður ÍSÍ sé hugsaður þannig að hægt sé að greiða bónusa með honum. Við viljum fá meira gagnsæi á hvernig þetta er úthlutað en þá yrðu allir sáttari,“ segir hún.

„Ég kalla eftir skýrum reglum þegar kemur að þessu sem eru mjög gegnsæar. Nú er sjóðurinn að stækka og það er ótrúlega mikið fagnaðarefni að það sé að gerast. Það má hrósa Íþrótta- og Ólympíusambandinu og forseta þess vel fyrir góð störf þar, en þegar maður sér þessa úthlutun núna hræðist maður svolítið hvað gerist. Gegnsæi númer eitt, tvö og þrjú mun breyta ótrúlega miklu,“ segir Sólveig Jónsdóttir.

Alla frétt Stöðvar 2 um málið má sjá í spilaranum hér að ofan.