Æðið vindur upp á sig og Gudjohn­sen-merking ó­keypis

Eftir að hafa skorað sjö mörk í 25 leikjum með Blackburn á síðustu leiktíð hefur Andri þegar náð að skora níu mörk í tólf leikjum í haust. Þar af eru átta mörk í ensku B-deildinni og aðeins Will Lankshear hjá Middlesbrough er með fleiri eða ellefu.

Andri hefur sérstaklega verið funheitur í leikjunum eftir landsleikjahléið, eftir að hafa skorað tvö mörk fyrir Ísland, því hann hefur nú skorað tvennu í tveimur leikjum í röð og alls fimm mörk í síðustu fjórum leikjum með Blackburn.

Af því tilefni geta aðdáendur nú fengið að merkja Blackburn-treyjur frítt með nafni og númeri Andra en hann er að sjálfsögðu númer níu.

Eftir frammistöðu Andra á laugardaginn, þegar hann skoraði bæði mörkin gegn Hollywood-liði Wrexham í 2-0 sigri, hefur honum verið hrósað í hástert og sagði Tony Mowbray, stjóri Blackburn, í léttum tón:

„Farðu varlega, drengur því annars gætirðu endað í Barcelona eins og pabbi þinn,“ en Eiður Smári, pabbi Andra, lék með Barcelona í þrjú ár á árunum 2006-2009.

Stuðningsmenn Blackburn vonast nú til þess að Andri haldi áfram með sama hætti í erfiðum útileik gegn Swansea næsta laugardag. Swansea er í 2. sæti deildarinnar með 23 stig en Blackburn, sem unnið hefur þrjár af síðustu fjórum leikjum, er í 10. sæti með 18 stig.