„Blikarnir geta sleppt sér lausum“

„Þetta leggst vel í mig. Úrslitakeppnin að hefjast og að miklu að keppa fyrir okkur. Það er einhver von um að ná Víkingum en annars er þetta barátta við KR um annað sætið,“ segir Rúnar Kristinsson, þjálfari Fram, og bætir við að liðið sé með augun á Íslandsmeistaratitlinum á meðan það sé enn tölfræðilegur möguleiki að ná honum.

Blikar urðu bikarmeistarar síðastliðinn föstudag og hafa að engu að keppa í deildinni lengur. Rúnar er þó ekki að gera ráð fyrir neinni bikarþynnku hjá Blikum.

Blikar lausir við pressuna

„Það má setja þetta upp eins og það sé ekki að neinu að keppa fyrir Blika en það má líka setja dæmið upp þannig að það sé þungu fargi létt af Blikunum. Komnir með titil og öruggir í Evrópukeppni. Þá geta menn sleppt sér lausum því það er búið að vera erfitt hjá þeim síðustu vikur,“ segir Rúnar og bætir við.

„Það er búin að vera pressa á liðinu að ná árangri sem hefur ekki verið að ganga upp í deildinni. Bikarinn var þeim afar mikilvægur. Kannski koma leikmenn mjög afslappaðir og rólegir inn í leikinn. Þeir eru með fullt af góðum leikmönnum og ef þeir spila með axlirnar aðeins niðri í stað þess að vera stífar upp í loftið af stressi og álagi að þá held ég að þeir geti sleppt sér lausum í kvöld og notið þess að spila fótbolta.“

Ekkert að hugsa um vera ofar en KR

Rúnar er KR-ingur eins og allir þekkja og var að þjálfa KR-liðið í mörg ár áður en hann tók við Fram-liðinu. Undir hans stjórn hefur Fram verið á stöðugri uppleið. Rúnar þvertekur fyrir að það skipti sig persónulega einhverju sérstöku máli að enda fyrir ofan KR í deildinni.

„Fyrir Fram skiptir það miklu máli en fyrir mig persónulega skiptir það engu máli. Ég vil ná sem bestum árangri fyrir Fram og auðvitað fyrir sjálfan mig. Maður er í þessu til þess að ná árangri og vinna fótboltaleiki. Það gæti verið betra að fjárhagslega að lenda í öðru sæti út af Evrópukeppni til að mynda. Það er því að miklu að keppa fyrir okkur og KR.“