„Þeir litu ekki út fyrir að vera í formi“

Shearer er markahæsti leikmaður í sögu deildarinnar og starfar sem sparkspekingur fyrir BBC.

„Ég var ekki búinn að horfa á Manchester United á undirbúningstímabilinu. Ég sá þá bara í þessum leik og þeir litu út fyrir að vera ekki í formi. Þeir virkuðu ekki tilbúnir til að spila 90 mínútur af mikilli ákefð, á erfiðum útivelli gegn orkumiklu liði. Það var bara eitt lið sem leit út fyrir að vera tilbúið í þennan leik og það var ekki Manchester United,“ sagði Shearer eftir leik.

„Við vitum að í ensku úrvalsdeildinni eru erfiðir útivellir. Þú þarft að mæta með sömu orku og ákefð en við gerðum það ekki. Tvö föst leikatriði kostuðu okkur leikinn,“ sagði Bruno Fernandes, fyrirliði Manchester United, eftir leik.

„Ég skil pirring stuðningsmanna, við viljum byrja öll tímabil af krafti og koma okkur strax í samkeppni. Við viljum vinna alla leiki og við þurfum stuðningsmennina með okkur í lið, ásamt því að trúa á okkur sjálfa,“ bætti Fernandes við.