„Ég skora náttúru­lega ekki oft þannig að þetta er eigin­lega krafta­verk“

Lillý Rut Hlynsdóttir skoraði eina mark leiksins í lok venjulegs leiktíma en hún er uppalin fyrir norðan og var því að skora gegn uppeldisfélagi sínu. Hún segir tilfinningarnar vera góðar eftir leik.

„Bara mjög góðar. Þetta var náttúrulega lífsnauðsynlegur sigur fyrir okkur í baráttunni sem við erum í þannig við erum mjög sáttar.“

Valskonur áttu ekki sérstakan fyrri hálfleik en spilamennskan batnaði til hins betra í síðari hálfleik.

„Mér fannst við undir svona sérstaklega í baráttunni í fyrri hálfleik þannig við töluðum mikið um það í hálfleik að við þyrftum að mæta þeim þar og mér fannst við gera það miklu betur í seinni og það varð allt annar leikur fyrir okkur.“

Voruð þið ekki bara nokkuð heppnar að vera með jafnan leik í hálfleik?

„Jú í rauninni. Mér fannst þær bara yfir eiginlega bara í flestu í fyrri hálfleik þannig að já við vorum eiginlega heppnar að vera ekki undir í hálfleik og bara stolt af liðinu að hafa tekið sig saman í andlitinu í seinni og klárað þetta.“

Lillý skoraði sigurmarkið á síðustu mínútu venjulegs leiktíma en hún er uppalin í Þór og spilaði með Þór/KA áður en hún skipti yfir í Val.

„Ég er bara glöð að við unnum sko. Það er það eina og ég skora náttúrulega ekki oft þannig að þetta er eiginlega kraftaverk bara en jú jú ég er bara mjög glöð og mjög stolt af liðinu í dag.“

Lillý skallaði boltann aftur fyrir sig og inn af stuttu færi eftir fyrirgjöf frá Margréti Brynju Kristinsdóttur.

„Ég átti ekki von á að boltinn myndi koma, ég hélt meira segja að ég væri rangstæð því mér fannst ég svo alein þannig að ég er bara glöð að þetta mark stóð og náði að hjálpa liðinu.“

Valur er í fallbaráttu en lyftir sér úr fallsæti og yfir Fram í áttunda sæti á markatölu. Aðeins tvö stig eru svo upp í Þór/KA í sjöunda sæti.

„Þetta er bara mjög nauðsynlegur sigur fyrir okkur og erum búin að vera loka svona mikið af lélegum mörkum þannig að ég er bara eiginlega mest ánægð með að við höfum haldið hreinu og vonandi höldum því áfram“, sagði Lillý að lokum.