Ís­lands­meistari annað árið í röð eftir al­gjöra yfir­burði

Dagbjartur lék hring dagsins á pari en það varð aldrei spenna í baráttunni um titilinn. Hann var með fimm högga forystu fyrir daginn og þrátt fyrir ljómandi fína spilamennsku Arons Emils Gunnarssonar stærstan part færðist aldrei spenna í leikinn.

Dagbjartur fékk fjóra fugla og fjóra skolla á hring dagsins og stóð uppi sem sigurvegari á tíu höggum undir pari.

Aron Emil Gunnarsson úr Golfklúbbi Selfoss hafnaði í öðru sæti, fjórum höggum á eftir Dagbjarti, eftir að hafa farið hring dagsins á tveimur undir pari vallar og var alls á sex undir.

Kristján Karl Guðjónsson úr Golfklúbbi Mosfellsbæjar varð í þriðja sæti eftir að hafa verið á fjórum undir pari í dag en hann var á þremur undir pari í heildina, eftir að hafa verið á einu yfir pari fyrir hring dagsins.

Tómas Eiríksson Hjaltested, GR, varð fjórði á tveimur undir pari og hinn 16 ára gamli Hjalti Kristján Hjaltason sem setti vallarmet á þriðja hringnum í gær varð fimmti á pari, eftir að hafa farið hring dagsins á þremur yfir pari vallar.

Dagbjartur er úr Golfklúbbi Reykjavíkur og vann titilinn á heimavelli þetta árið og varði sinn fyrsta titil, sem hann vann í fyrra.

Guðrún Brá Björgvinsdóttir varði einnig titil sinn í kvennaflokki en þetta er í fyrsta sinn síðan 1992 sem sigurvegarinn í bæði karla- og kvennaflokki ver titil sinn.

Úlfar Jónsson og Karen Sævarsdóttir unnu titilinn fjögur ár í röð frá 1989 til 1992. Karen vann hann raunar átta ár í röð, frá 1989 til 1996.