Valdi tíu verstu augna­blik Stjörnumanna á Skaganum: „Eins og þeir væru drukknir“

Stjarnan hefur tapað síðustu tveimur leikjum sínum í Bestu deild karla með markatölunni 1-10 og er aðeins tveimur stigum frá fallsæti.

Albert greindi frammistöðu Stjörnunnar gegn ÍA í Stúkunni í gær og ákvað að velja tíu lágpunkta Garðbæinga í leiknum.

„Öll umræða er um Árna Snæ [Ólafsson, markvörð Stjörnunnar] í þessum leik. Hann gefur tvö mörk. Jón Þór [Hauksson, þjálfari Stjörnunnar] talaði um hversu lélegir þeir væru án bolta og hvað þeir settu í leikinn. En mér finnst ósanngjarnt að taka einn fyrir,“ sagði Albert.

„Yfirleitt þegar ég er með lista er ég með fimm atvik. En hann var bara það langur að ég stoppaði bara í tíu svo við verðum ekki hérna í allt kvöld.“

Albert byrjaði svo að sýna gloríur Garðbæinga úr leiknum.

„Það voru ekki bara 1-2 sem áttu hauskúpuleik. Það var allt liðið. Það er enginn sem nær fimm í einkunn. Það var eins og þeir væru drukknir að spila þarna inn á,“ sagði Albert.

Næsti leikur Stjörnunnar er gegn Ilves í Finnlandi á fimmtudaginn. Stjörnumenn unnu fyrri leikinn í einvíginu, 2-1, og með hagstæðum úrslitum í Finnlandi tryggja þeir sér sæti í 3. umferð forkeppni Sambandsdeildar Evrópu.

Í næsta leik sínum í Bestu deildinni sækir Stjarnan Val heim. Leikurinn fer fram á Hlíðarenda næsta þriðjudag.

Innslagið úr Stúkunni má sjá í spilaranum hér fyrir ofan.