Þjálfarinn rekinn eftir hótun leik­manns

Ein af stjörnum senegalska liðsins, Pape Gueye, sagðist eftir HM ekki ætla að spila aftur fyrir landsliðið á meðan að Pape Thiaw og hans teymi yrði við stjórnvölinn.

Í dag tilkynnti svo senegalska knattspyrnusambandið að Thiaw hefði verið rekinn, sem og aðstoðarmenn hans.

„Eftir ítarlegt mat á íþróttalegum árangri og framtíðarhorfum landsliðsins hefur Pape Thiaw verið leystur frá störfum í þágu senegalskrar knattspyrnu,“ segir í yfirlýsingu frá sambandinu.

Thiaw hafði verið þjálfari Senegals frá því í desember 2024. Liðið komst áfram í 32-liða úrslitin á HM sem eitt af liðunum með bestan árangur í 3. sæti síns riðils en tapaði svo í framlengdum leik gegn Belgum, eftir að hafa komist í 2-0.