Blaðran heldur á­fram að bögga McIlroy

Tvíríkjandi Masters-meistarinn mætir kokhraustur til leiks á PGA meistaramótið eftir gott gengi undanfarið og þykir sigurstranglegastur ásamt Scottie Scheffler. Það yrði þriðji sigur McIlroy á PGA meistaramótinu en hann vann það einnig árin 2012 og 2014.

McIlroy hefur hins vegar verið að glíma við meiðsli, ef svo mætti kalla. Á síðustu tveimur æfingum í aðdraganda keppninnar hefur hann hætt snemma vegna sársauka í fætinum.

Hann hætti eftir aðeins þrjár holur af æfingahringnum í gær.

„Ég er með blöðru undir litlu tánöglinni á hægri færi. Mér er aðeins illt í þessu en þetta verður allt í lagi,“ sagði McIlroy svo við Reuters í morgun. Hann greindi einnig frá því að hann hefði hækkað sig um eina skóstærð til að minnka álagið á blöðrunni en samt fundið fyrir sársauka.

„Ég reif tánöglina bara af í gærkvöldi. Þetta pirraði mig svo mikið. Ég lagðist bara í baðið og fékk hana til að mýkjast. Svo sprengdi ég blöðruna. Mér líður betur í dag,“ sagði McIlroy einnig í morgun.

Hann virðist þó ekki alveg hafa jafnað sig því á æfingu dagsins hætti hann einnig snemma. McIlroy sást fikta eitthvað við hægri fótinn, settist í grasið og klæddi sig úr sokknum áður en hann hélt snemma upp í hús.

McIlroy hefur leik á PGA meistaramótinu klukkan 12:40 að íslenskum tíma á morgun. Hann verður í holli með Jon Rahm og Jordan Spieth.

Bein útsending frá PGA meistaramótinu verður á Sýn Sport Viaplay frá klukkan 11:00 á morgun.