Hlustun á Bó snaraukist

Hlustunartölurnar má sjá á vefsíðu greiningartólsins Soundcharts en þar er hægt að fylgjast með hlustun og áhorfi á tónlistarmönnum á helstu tónlistarveitum og samfélagsmiðlum.

Þegar síða Björgvins Halldórssonar er skoðuð á Soundcharts má sjá yfirlit yfir þau lönd og borgir þar sem er hlustað mest á hann. Á eftir Íslandi koma Danmörk og Noregur sem kemur kannski ekki á óvart vegna fjölda Íslendinga sem eru búsettir þar.

Samkvæmt Soundcharts eru mánaðarlegir hlustendur á Björgvin á Íslandi síðasta mánuðinn um 36,9 þúsund sem er 37,6 prósent aukning frá síðasta mánuði. Áhorfið á Bó á Youtube er ekki mikið minna síðasta mánuðinn, um 32,9 þúsund Íslendinga hafa horft á myndbönd þar, en aukningin milli mánaða er þó gríðarleg, eða 447,8 prósent.

Hlustendurnir eru tæplega sjöhundruð talsins í Danmörku og á fimmta hundrað í Noregi. Hins vegar hefur hlustunin líka aukist töluvert þar, um rúm 66 prósent í Danmörku og 45 prósent í Noregi. 

Þá er hægt að sjá á síðunni þær borgir þar sem hlustunin er mest. Reykjavík trónir á toppnum með tæplega 24 þúsund hlustendur, þar á eftir kemur Kópavogur með rúm fjögur þúsund og loks Hafnarfjörður, heimabær skáldsins, með tæp þrjú þúsund. Hlustunin í Reykjavík hefur aukist um 36 prósent, í Hafnarfirði hefur hún aukist um tæp 47 prósent en í Kópavogi hefur hún aukist um helming.

Viðtöl, sjónvarpsþættir og tónlist rifjuð upp

Mörg hundruð manns hafa minnst Björgvins Halldórssonar í riti frá því hann lést. Fjölskylda og vandamenn, fjöldi kollega, samferðamenn og meira að segja forseti Íslands hafa minnst tónlistarmannsins.

Björgvin hefði fagnað 75 ára afmæli í gær, 16. apríl, hefði hann ekki fallið sviplega frá. Í tilefni afmælisdagsins tilkynnti Hafnfarfjarðarbær að bærinn hefði samþykkt að vinna að sýningu um ævi og feril tónlistarmannsins. 

Áhuginn á Björgvini og tónlist hans hefur verið mikill í kjölfar andlátsins og hafa bæði Sýn og Ríkisútvarpið brugðist við með því að gera ýmsa þætti og kvikmyndir úr söfnum sínum aðgengileg á ný. 

Daginn sem Björgvin lést endursýndi Sýn þátt úr Kvöldstund með Eyþóri Inga þar sem hann fékk Björgvin í heimsókn til sín. Í gær var endursýndur þáttur úr Tónlistarmönnunum okkar þar sem Auðunn Blöndal ræddi við Bó um ferilinn. Í kvöld verða Bestu lög Björgvins sýnd á Sýn en það er upptaka frá tónleikum hans í Háskólabíói árið 2015.

Allt þetta og meira til er aðgengilegt í flokknum „Þó líði ár og öld“ á sjónvarpsveitu Sýnar. Í spilara Vísis er síðan að finna fjölmargar klippur langt aftur í tímann með viðtölum, þáttum og tónleikum Björgvins. Til að mynda klukkutímalangan þátt af Bylgjunni órafmagnaðri þar sem Bó söng með börnum sínum, Krumma og Svölu.

Á sarpi ríkisútvarpsins er að finna heimildarmyndina Maður sviðs og söngva frá 2018 eftir Ágúst Guðmundsson, viðtalið Björgvin - Bolur inn við beinið þar sem Þórhallur Gunnarssonar ræddi við Björgvin í tilefni af sextugsafmæli söngvarans árið 2011 og þátturinn Björgvin Halldórsson: 1979 þar sem söngferill hans var rifjaður upp.

Útvarpsmaðurinn Ívar Guðmundsson mun síðan flytja minningarþáttinn „Bylgjan kveður Bó“ á Bylgjunni á sunnudaginn klukkan 12:20, beint eftir hádegisfréttir. Ívar og Björgvin voru vinir til áratuga, unnu lengi saman og Ívar fylgdi honum í gegnum árin bæði í lífi og starfi. 

Í þættinum heyrast brot úr viðtölum við Björgvin frá síðustu áratugum, tónlist hans verður spiluð og ferill goðsagnarinnar rifjaður upp.