Rifnar treyjur og rauð spjöld: Albert og Suslov sáu rautt eftir að upp úr sauð

Fiorentina hafði betur í leiknum, 0-1 eftir mark Nicoló Fagioli á 82.mínútu. Það var skömmu eftir mark Fagioli þegar að upp úr sauð milli leikmanna liðanna.

Verona fékk aukaspyrnu rétt fyrir utan teig Fiorentina og fannst leikmönnum liðsins að Albert stæði of nálægt spyrnumönnum Verona. 

Téður Suslov sem og liðsfélagi hans hjá Verona, Jean-Daniel Akpro mættu til þess að færa Albert aftar en áttu ekki erindi sem erfiði og fóru hlutirnir fljótlega úr böndunum.

Suslov tók harkalega á Alberti sem var skiljanlega ekki sama um það og streittist á móti. Engin högg voru veitt en bæði Albert og Suslov enduðu með rifnar treyjur sem segir sitthvað um átökin þeirra á milli. 

Dómari leiksins hafði engan húmor fyrir þessu og gaf þeim báðum rauða spjaldið. Aðdragandi ósættisins alls ekki mikill en spennustigið í leiknum hátt og tíminn naumur fyrir Verona til þess að jafna.

Hvort rauðu spjöldin hafi átt rétt á sér skal látið ósagt en vel hefði verið hægt að réttlæta að leikmenn hefðu fengið að líta gul spjöld fyrir sinn þátt í ringulreiðinni.