„Þarna áttu bara að taka yfir leikinn“

Lundúnaslagurinn var ræddur í Sunnudagsmessunni í gær og þáttastjórnandinn Kjartan Atli Kjartansson benti á að eftir mörkin tvö í gær hefðu varnarmenn Arsenal skorað níu mörk eftir föst leikatriði á þessu tímabili.

Nafni hans, Kjartan Henry Finnbogason, var sammála því að hornspyrnurnar og varnarmennirnir væru mikilvæg vopn en hann vill líka sjá liðið spila betri fótbolta.

Þá benti Kjartan Henry á að meira að segja þegar Arsenal var manni fleiri þá var það Chelsea sem stjórnaði spilinu.

„Chelsea er mikið meira með boltann í fyrri hálfleik en það var áhugavert þegar þeir misstu mann af velli í kringum sjötugustu mínútu, þá voru þeir líka meira með boltann.“

„Ég veit að það að vera með boltann vinnur enga fótboltaleiki, en þú ert á heimavelli, þú ert Arsenal, þú ert með alla þessa leikmenn, þarna áttu bara að taka yfir leikinn. Fara og vinna 3-1, 4-1, 5-1,“ sagði Kjartan Henry.

Umræðuna má sjá í spilaranum að ofan. 

Arsenal og Chelsea verða bæði í eldlínunni á miðvikudagskvöld þegar þau heimsækja Brighton og Aston Villa í 29. umferð ensku úrvalsdeildarinnar.