Tölurnar á móti Svíum: Viggó 11 af 11 í skotum og 23 fleiri stopp en Svíar

Íslenska landsliðið bauð upp á allt það besta sem hægt er að biðja um frá liðinu, agaðan klókan og hnitmaðan sóknarleik í bland við skynsaman varnarleik þar sem baráttugleðin og samvinnan mátaði Svíana. Svíarnir voru felldir á eigin bragði.

Það besta við allt saman er að íslensku strákarnir gerðu þetta ekki einu sinni heldur en tvisvar. Þeir voru sex mörkum yfir í hálfleik en misstu þetta niður í eitt mark. Í stað þess að missa dampinn sýndi liðið gríðarlega sterkan karakter og náði aftur upp sex marka forskoti og gott betur.

Löglegar stöðvanir segja mikið um gang mála í þessum leik. Á meðan Svíarnir náðu ekki í skottið á íslensku strákunum þá stoppaði íslenska vörnin hvað eftir annað. Íslensku strákarnir náðu 23 fleiri stoppum í leiknum eða 41 á móti 19 sem er ótrúleg tölfræði.

Íslenska liðið nýtti líka sóknir sínar frábærlega, liðið tapaði aðeins fimm boltum og nýtti 76 prósent skota sinna.

Maður leiksins hjá íslenska liðinu byrjaði ekki leikinn en Viggó Kristjánsson steig ekki feilspor eftir að hann kom inn á völlinn. Viggó nýtti ellefu af ellefu skotum og fékk 10,0 í sóknareinkunn hjá HB Statz.

Viggó Kristjánsson kom inn til að taka víti eftir að Ómar Ingi klikkaði á fyrsta vítinu. Viggó nýtti vítin vel og bætti síðan við tveimur frábærum mörkum og var því kominn með sjö mörk í hálfleik. Íslenska liðið fékk sex víti í fyrri hálfleiknum og Gísli fiskaði þrjú þeirra.

Viktor Gísli Hallgrímsson varði tvö víti í fyrri hálfleiknum og jafnt og stöðugt allan hálfleikinn. Hann hélt því áfram í seinni og drap þá endanlega alla von hjá Svíunum um að koma til baka.

Þá má ekki gleyma leikstjórn Gísla Þorgeirs Kristjánssonar. Hann átti ellefu stoðsendingar en bjó alls til fimmtán færi fyrir liðsfélagana auk þess að fiska fjögur víti og fiska þrjá Svía út af í tvær mínútur. Gísli sprengdi upp sænsku vörnina hvað eftir annað og á rosalega mikinn þátt í því að sóknarleikurinn gekk svona vel.

Vísir fylgist vel með tölfræði íslenska liðsins á mótinu og hefur nú tekið saman þá leikmenn sem sköruðu fram úr í tölunum í þessum fyrsta leik Íslands á mótinu. Hér fyrir neðan má sjá toppa íslenska liðsins í tölfræðinni.