Kærður af knattspyrnusambandinu

Valur Páll Eiríksson skrifar 25. desember 2025 13:00

Romero var með stæla eftir að honum var vísað af velli. Ibrahima Konaté reynir hér að koma viti fyrir hann. Joe Prior/Visionhaus via Getty Images

Cristian Romero, varnarmaður Tottenham Hotspur, sætir kæru frá enska knattspyrnusambandinu vegna framkomu sinnar í leik liðsins við Liverpool í ensku úrvalsdeildinni síðustu helgi.

Romero er einn tveggja Spursara, ásamt Xavi Simons, sem var vísað af velli í leiknum. Romero fékk að líta sitt annað gula spjald seint í leiknum þegar hann var seinn í tæklingu.

Hann þrætti fyrir dóminn og tók sér heljarinnar tíma í að koma sér af velli. Sú framkoma er ástæða kærunnar að sögn sambandsins.

„Cristian Romero hefur verið kærður í kjölfar leiks Tottenham við Liverpool á laugardag 20. desember. Hann er sakaður um að hafa sýnt af sér óviðunandi hegðun með því að koma sér ekki snarlega af velli og/eða að hafa komið fram með ágengum hætti í garð dómara eftir að hafa verið vísað af velli á 93. mínútu,“ segir í yfirlýsingu sambandsins.

Romero verður í banni þegar Tottenham mætir Crystal Palace á sunnudaginn 28. desember en gæti fengið lengra bann sökum hegðunar sinnar.

Hann hefur til 2. janúar að svara kærunni og ásökunum sambandsins.