„Er nú rétt að jafna mig á slæmu Wham! blæti“

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Mér finnst afskaplega gaman að vakna og byrja daginn svo vekjaraklukka er oftast óþörf, nokkuð sem hinn tvítugi Guðni gæti alls ekki tengt við. Að klára ræktina og vera mættur á skrifstofuna um klukkan átta er besta byrjunin á góðum degi. 

Þá daga sem líkaminn harðneitar að mæta í ræktina, hann er ótrúlega harður samningamaður, þá vakna ég klukkan sjö Ég nota svo laugardagsmorgna til að ná góðri hvíld og endurhlaða batteríið.“

Hvað er það fyrsta sem þú gerir á morgnana?

„Ég er óþolinmóða týpan og er ekki mikið að dúlla mér á morgnana. Ég legg fram skrifstofugallann og æfingafötin á kvöldin svo ég geti skotist hratt úr húsi þegar ég vakna. 

Á æfingadögum tekur þetta augnablik en ef haldið er beint á skrifstofuna þá er ég komin út úr húsi á korteri. Fyrsti kaffibollinn sem núna er orðið decaf er tekinn á skrifstofunni á meðan ég forgangsraða verkefnum dagsins. 

Þau skipti sem ég hef ákveðið að taka morguninn með fjölskyldunni þá hefur mér góðfúslega verið bent á að það sé óþarfi að tala svona mikið, svo þetta fyrirkomulag bara virkar vel.“

Á skalanum 0-10 hversu mikill dellu-kall ertu?

„Sannanlega 10 af 10 mögulegum. Dellulistinn er langur; hestar, karate, golf, veiði, Aikido, svifdrekaflug, hljóðfæri og bókaskrif. 

Mér líður best þegar ég er „all in“ í einhverju og er nú rétt að jafna mig á slæmu Wham! blæti sem ég fékk í sumar. 

Hvort sem það var í bílnum, úti við árbakkann eða á mannamótum þá þurftu allir að þola þetta með mér. 

Það er ekkert skemmtilegt nema maður taki það alla leið og samhliða þessu æði voru allar bækur sem ég komst yfir um snillinginn hann George Michael og samferðamenn hans lesnar og saxafóninn sem er jú enn ein dellan, tekinn fram og taktar úr Careless Whisper æfðir.“

Í hvaða verkefni ertu að vinna helst í þessa dagana?

„Við erum að vinna samkvæmt fimm ára vaxtastefnu sem þegar er farin að skila sér í hressilegri tekjuaukningu og settum við þar met á síðasta ársfjórðungi. 

En aukin umsvif og stærri vinnustaður krefjast líka sterkra innviða og núna erum við að styrkja innra skipulagið, endurgera ferla, auka nýtingu allra þeirra gagna sem við eigum og fjárfesta í frábæra starfsfólkinu okkar og vinnustaðnum svo við getum sigrað vaxtarmarkmiðin okkar sem samhelt teymi.“

Hvernig skipuleggur þú þig í vinnu?

„Ég er með marga bolta á lofti og OneNote og Outlook eru mína daglegu hjálparhellur. Nýverið hófum við vegferð með öllu starfsfólki við að læra inn á og tileinka okkur sjö venjur til árangurs samkvæmt fræðum Franklin Covey.

Sú aðferðafræði er frábær leið til þess að kjarna það sem mestu máli skiptir og forgangsraða en er sömuleiðis öflugt tól til þess að styrkja samskiptin þvert á deildir fyrirtækisins og skipuleggja verkefnin í sameiningu.“

Hvenær ferðu að sofa á kvöldin?

„Of seint er stutta svarið, líklega um hálf tólf. Ég les eða hlusta á hljóðbækur áður en ég sofna og er alæta á efni. 

Núna er biblían frá Flyvbjerg um verkefnastjórnun stórra framkvæmda á náttborðinu við hliðina á ævisögum Ian Fleming og Elon Musk og þar undir gæist Tinnabókin Kolafarmurinn. 

Allt topp bækur fyrir stjórnendur en ef ég væri að halda í ímyndaða flugferð þá vildi ég heldur hafa Tinna í sætinu við hliðina á mér en Musk.“