Liverpool sam­þykkir að greiða þrettán milljarða fyrir Ekitike

Liverpool greiðir 69 milljónir punda fyrir framherjann, en verðið gæti hækkað upp í 79 milljónir með árangurstengdum bónusgreiðslum. Alls gæti Liverpool því greitt rúma þrettán milljarða íslenskra króna fyrir leikmanninn.

Mark McAdam á Sky Sports greinir frá því að búist sé við því að Ekitike fljúgi til Liverpool og gangist undir læknisskoðun síðar í þessari viku.

Ekitike kemur til Liverpool frá Eintracht Frankurt þar sem hann hefur leikið frá því í fyrra, fyrst á láni frá PSG áður en hann var keyptur síðasta sumar.

Á síðasta tímabili skoraði hann 15 mörk í 33 deildarleikjum fyrir Frankfurt.

Ekitike bætist því í hóp öflugra leikmanna sem Liverpool hefur sótt í sumar. Liðið hefur nú þegar gengið frá kaupum á Florian Wirtz og Jeremie Frimpong frá Bayer Leverkusen og Milos Kerkez frá Bournemouth.