„Raun­hæfur mögu­leiki“ að hitamet falli á morgun

Á veðurkortum Veðurstofunnar má sjá að á morgun er spáð sól og hita yfir tuttugu stigum á öllu landinu. Oddur Ævar ræddi við Óla Þór Árnason veðurfræðing í kvöldfréttum Sýnar um veðrið næstu daga.

Eru hitamet að fara að falla á morgun?

„Það er alveg raunhæfur möguleiki. Metin eru frá 1939 í júní, 30,5 gráður á Teigarhorni og aðeins lægri á Kirkjubæjarklaustri og það er alveg rými á morgun til þess að slá metin,“ sagði Óli Þór.

Hvar er líklegast að þetta hitamet falli?

„Eins og staðan er núna þá er líklegast inn til landsins á norðausturlandi, Mývatn gæti verið góður kandídat til dæmis. Eða jafnvel á Suðurlandsundirlendinu einhvers staðar, þar nær hafgola líklega ekki að hafa áhrif á morgun. Flestir aðrir landshlutar fá einhverja hafgolu þannig það truflar svolítið hæstu tölurnar.“

Fólk fær mikinn hita og líka sól?

„Já, það verður býsna bjart og gott veður um allt land. Vissulega svolíið  misskipt, það er einhver þokuhætta við norðausturströndina en annars bara mjög gott veður á landinu,“ sagði Óli.

Röðin komin að Íslandi

Hvenær fara skýin að banka upp á aftur hjá okkur?

„Þriðjudagurinn er svipaður, ekki eins háar hitatölur en mjög gott veður. Síðan frá og með miðvikudegi er gert ráð fyrir að það komi síðdegisskúrir nokkuð víða um land. Þannig það er kannski eins gott að njóta þessara daga núna.“

Þetta er alveg einstaklega gott veður þessa dagana, er þetta bara eðlilegt fyrir júlímánuð?

„Það er ansi margt sem þarf að hitta, við þurfum að fá þetta hlýja loft frá Evrópu, það þarf að rata alla leið til okkar og vindáttin að vera rétt. Það eru ansi mörg ef sem þurfa að ganga saman til þess að fá þetta. Núna er röðin komin að okkur að fá smá hlýindi,“ sagði Ólafur Þór að lokum.