Kærleiksbomba frá GusGus

Dóra Júlía Agnarsdóttir skrifar 19. maí 2025 20:03

Tatjana Dís, Biggi Veira og Unnsteinn Manúel koma saman í sumarsmellinum Partýið er þú og ég. Skjáskot

„Eins og kannski flestir Íslendingar er ég súperfan af GusGus og var ég því ekki lengi að svara kallinu þegar vinur minn Marteinn spurði hvort ég vildi gera lag með þeim,“ segir tónlistarkonan Tatjana Dís sem er hluti af GusGus ofur sumarsmellinum Partýið er þú og ég.

GusGus, Unnsteinn Manúel, Tatjana og Marteinn Harðarson, betur þekktur sem Bngrboy koma saman að laginu.

Hér má sjá myndbandið á streymisveitunni Youtube:

Í fréttatilkynningu segir:

„Þrátt fyrir margt ískyggilegt sem hægt er að hafa áhyggjur af er mikilvægt að halda samt í tilganginn með þessu öllu. Þess vegna hafa Gusgus liðar valið að varðveita kærleikann.

Með góðri hjálp frá samherjum ástarinnar, Tatjönu, Unnsteini og Bngrboy er boðið upp á Diskópartý sem gott er að hafa nálægt hjartanu í sumarsólinni framundan.“

Klippa: Gusgus ft. Tatjana, Unnsteinn & Bngrboy - Partýið er þú og ég

Blaðamaður náði tali af Tatjönu sem er í skýjunum með samstarfið.

„Eins og kannski flestir Íslendingar er ég súperfan af GusGus og var ég því ekki lengi að svara kallinu þegar vinur minn Marteinn spurði hvort ég vildi gera lag með þeim.

Að verja tíma í hljóðverinu hans Bigga var algjör draumur og ferlið einstaklega lærdómsríkt og gjöfult. Hann kenndi og sýndi mér svo margt sem ég verð ævinlega þakklát fyrir og mun taka sem veganesti út í lífið.

Hann Unnsteinn er fagmaður fram í fingurgóma, í dansi, söng og leikstjórn og það er ekkert nema gaman að vinna með honum. Svo er ég held ég elsti aðdáandi Marteins en þetta er ekki síðasta lagið sem við gerum saman.“

Hér má svo hlusta á smellinn á streymisveitunni Spotify.

Tónlist