Mosfellingar fundu markaskóna og Fylkismenn orðnir níu fyrir hálf­leik

Afturelding hafði ekki skorað í fyrstu tveimur leikjum sínum í Bestu deildinni en Mosfellingar skoruðu fimm mörk í dag í 5-0 sigri á Hetti/Hugin.

Bræðurnir Elmar Cogic og Enes Cogic skoruðu báðir í fyrri hálfleiknum en í þeim síðari bættu þeir Aron Elí Sævarsson, Hrannar Snær Magnússon og Arnór Gauti Ragnarsson við mörkum.

Fylkismenn komust snemma yfir á móti Kára en misstu svo tvo leikmenn út af með rautt spjald í fyrri hálfleik. Árbæingar töpuðu leiknum á endanum 2-1. Leikið var í Akraneshöllinni.

Fyrsta mark leiksins var sjálfsmark Káramannsins Oskars Wasilewski á 20. mínútu en þrettán mínútum síðar fékk Ragnar Bragi Sveinsson, fyrirliði Fylkis, rautt spjald.

Fylkismenn urðu síðan níu þegar Eyþór Aron Wöhler fékk rautt spjald á lokamínútu fyrri hálfleiks. Káramenn skoruðu tvö mörk í seinni hálfleik en þau skoruðu Hektor Bergmann Garðarsson og Þór Llorens Þórðarson.

Kári er í 2. deildinni, sem er C-deild, og eru Káramenn því deild neðar en Fylkismenn sem féllu úr Bestu deildinni síðasta haust.

Hinn nítján ára gamli Gabríel Aron Sævarsson tryggði Keflavík 1-0 sigur á Leikni Reykjavík.

Víkingar úr Ólafsvík unnu 7-1 stórsigur á Úlfunum. Úlfarnir komust reyndar yfir með marki Kristjáns Ólafs Torfasonar eftir aðeins átta mínútna leik en heimamenn svöruðu með fimm mörkum fyrir hlé.

Fyrirliðinn Ingvar Freyr Þorsteinsson skoraði tvö mörk í fyrri hálfleik en hin mörkin í hálfleiknum skoruðu Kristófer Áki Hlinason, Björn Darri Ásmundsson og Ellert Gauti Heiðarsson.

Varamaðurinn Ingólfur Sigurðsson, fyrrum leikmaður KR, Vals og Fram, skoraði síðan tvö síðustu mörkin í seinni hálfleiknum. Hann kom inn á 61. mínútu, skoraði strax tveimur mínútum síðar og bætti síðan við öðru marki sex mínútum fyrir leikslok.