„Ég skil ekki hvernig við náum ekki að klára þetta“

„Ég skil ekki hvernig við náum ekki að klára þennan leik almennilega. Ég fæ gott færi í fyrri hálfleik sem ég átti að klára og svo fáum við bara fullt af dauðafærum og mjög svekkjandi að ná ekki að setja boltann í netið,“ sagði Oliver eftir leik. 

ÍBV tapaði 2-0 fyrir Víkingum í fyrsta leik þar sem liðið sýndi litla sóknartilburði og sköpuðu lítið jafnvel þó Víkingar væru orðnir einum færri. Færin komu hins vegar í dag.

„Við héldum áfram með varnarleikinn, stóðum okkur vel varnarlega fannst mér. Að koma okkur í færi er erfiðast að gera og svo þarf að klára. Það er gott að fá allavega færin en svekkjandi að klára þau ekki.“

ÍBV hefur leikið fyrstu tvo leiki sína í Bestu deildinni á útivelli þar sem verið er að leggja gervigras á Hásteinsvöll í Eyjum. Næsti leikur þeirra í deildinni verður í Eyjum þegar Fram kemur í heimsókn.

„Það á alltaf að vera erfitt að koma til Eyja og mæta okkur. Það er stefnan að láta menn finna fyrir því þegar þeir koma til Eyja,“ sagði Oliver að lokum.