Með rólegasta móti

Jón Þór Stefánsson skrifar 22. mars 2025 08:33

Hiti verður 0 til 7 stig yfir daginn, en í kringum frostmark á Norðaustur- og Austurlandi. Vísir/Vilhelm

Það er útlit fyrir að veður verði með rólegasta móti á landinu í dag, segir í textaspá Veðurstofunnar. Búist er við hægum vindi og einhverjum éljum á sveimi. Hiti verði 0 til 7 stig yfir daginn, en í kringum frostmark á Norðaustur- og Austurlandi.

Í kvöld er búist við dálítilli lægð úr vestri og undir miðnætti má búast við rigningu eða slyddu á vestanverðu landinu.

Í fyrramálið gengur lægðin austur yfir landið, vindur verður áfram hægur og rigning, slydda eða snjókoma með köflum í flestum landshlutum. Eftir hádegi á morgun styttir upp víðast hvar, en norðaustantil gengur í norðvestan strekking og þar má búast við lítilsháttar éljum.

Veðurhorfur á landinu næstu daga

Á sunnudag:

Vestlæg eða breytileg átt 3-10 m/s og rigning með köflum, en dálítil él um landið norðanvert. Styttir upp sunnan- og vestantil eftir hádegi. Hiti 0 til 6 stig, en kólnar um kvöldið.

Á mánudag:

Austlæg eða breytileg átt 5-15, hvassast syðst. Slydda eða snjókoma um morguninn og hiti um eða yfir frostmarki, en úrkomulítið og svalara norðan- og austanlands. Snjókoma með köflum víða um land seinnipartinn, en hlýnar með rigningu suðvestantil.

Á þriðjudag:

Suðvestan og sunnan 5-13 og dálítil rigning eða slydda, en þurrt um landið suðaustanvert. Hiti 1 til 7 stig. Bætir í úrkomu um kvöldið.

Á miðvikudag:

Breytileg átt, rigning eða slydda og hiti 1 til 8 stig. Kólnar norðanlands seinnipartinn með snjókomu.

Á fimmtudag:

Norðaustlæg átt. Él um landið norðan- og austanvert og hiti um eða undir frostmarki, en yfirleitt þurrt suðvestanlands með hita að 6 stigum.

Á föstudag:

Norðlæg eða breytileg átt og víða dálítil él. Kólnar í veðri.

Veður

Mest lesið

Fleiri fréttir