Dusta rykið af danssokkunum

Hér má sjá tónlistarmyndbandið við lagið Breathe In með Milkywhale

„Myndbandið er innblásið af sýningunni okkar Hverfa, sem við Árni gerðum fyrir Íslenska Dansflokkinn síðasta haust. Við vildum taka ákveðin sjónræn element úr sýningunni og leika okkur með þau en að sama skapi undirstrika dansgleðina sem hefur alltaf verið hluti af Milkywhale. 

Svo fannst okkur einfaldlega skemmtilegt að búa til dansfélaga úr hátölurum, fatarekkum, snúrum og ljósi,“ segir Melkorka.

Breathe In var að sögn hennar alltaf hugsað sem einhvers konar lokalag hvort sem er á plötu eða tónleikum.

„Textinn vísar að við vitum aldrei hvað framtíðin ber í skauti sér, en við getum dansað í núinu, lokað augunum, dregið djúpt andann og notið augnabliksins.“

Milkywhale var nýlega kynnt inn sem eitt af þeim atriðum sem koma fram á tónlistarhátíðinni Airwaves næstkomandi nóvember. Þau hlakka mikið til að rifja upp gamla takta.

„Við erum alveg ótrúlega spennt. Við spiluðum mikið erlendis á tímabili en fengum okkur svo bæði níu til fimm vinnu á sama tíma og höfum legið í dvala síðustu ár. Nú er hins vegar kominn tími til að dusta rykið af danssokkunum.

Við erum algjört rólyndisfólk utan sviðs sem elskum að drekka te á æfingum eða hittast og fá okkur súpu í hádeginu, svo umbreytumst við bara í partýdýr á tónleikum. 

Ég tók mitt fyrsta crowd surf fyrir troðfullu húsi á Iceland Airwaves í Iðnó fyrir nokkrum árum og það er klárlega kominn tími til að endurtaka leikinn.“

Hér má hlusta á Milkywhale á streymisveitunni Spotify.