Frá þessu segir í hugleiðingum veðurfræðings á vef Veðurstofunnar. Þar segir að enn ein lægðin gangi yfir landið í dag og fyrir hádegi verði suðaustan hvassviðri eða jafnvel stormur með talsverðu vatnsveðri á vestanverðu landinu.
„Gular viðvaranir eru í gildi vestantil fram eftir morgni. Mun hægari fyrir austan og úrkomulítið. Undir hádegi snýst svo vindur til suðvestanáttar, víða 10-18 með skúrum og ekki er ólíklegt að slyddu geri orðið vart í kröftugustu skúra hryðjunum.
Sjálf lægðin fer svo austur yfir landið í nótt og í fyrramálið og við tekur mun hægari norðvestanátt með éljum fyrir norðan og kólnar víðast hvar,“ segir á vef Veðurstofunnar.
Veðurhorfur á landinu næstu daga
Á laugardag (fyrsti vetrardagur): Vestan og suðvestan 8-15 m/s og skúrir eða slydduél, en víða bjartviðri fyrir austan. Hiti 1 til 5 stig. Norðvestlægari og él á norðanverðu landinu síðdegis, en styttir upp syðra og kólnar.
Á sunnudag: Breytileg átt, 3-10 og léttskýjað, en dálítil él við norður- og austurströndina. Frost víða 1 til 6 stig, en sums staðar frostlaust við sjávarsíðuna.
Á mánudag: Ákveðin suðlæg og suðvestlæg átt, rigning, slydda eða snjókoma og hiti 0 til 7 stig, mildast syðst, en vestlægari um kvöldið og skúrir eða él og kólnar heldur.
Á þriðjudag og miðvikudag: Suðvestlæg eða breytileg átt með skúrum eða slydduéljum, en lengst af bjart með köflum eystra. Hiti um og yfir frostmarki en að 5 stigum syðst.
Á fimmtudag: Útlit fyrir kalda norðanátt með ofankomu fyrir norðan en þurrt að kalla syðra.
