Rigning eða slydda norðan- og austan­lands

Á vef Veðurstofunnar segir að smá lægðardrag fyrir norðan land þokist nú suður og fylgi því dálítil rigning eða slydda norðan og austanlands í dag og sums staðar á Suður- og Vesturlandi í fyrramálið.

Síðan styttir að mestu upp, þó má áfram búast við einhverri vætu suðaustanlands. Annað kvöld er síðan spáð stöku éljum norðaustantil á landinu.

Hiti 0 til 9 stig að deginum, mildast við suðurströndina, en vægt frost í innsveitum á Norðausturlandi á morgun.

Veðurhorfur á landinu næstu daga

Á föstudag: Norðan- og norðaustan 3-10 m/s. Dálítil rigning eða slydda á Suður- og Vesturlandi, en snjómugga norðaustantil. Styttir síðan að mestu upp. Hiti 2 til 8 stig yfir daginn, en kringum frostmark norðaustanlands.

Á laugardag: Austan 3-8 og rigning eða slydda með köflum um landið sunnan- og vestanvert, en dálítil snjókoma norðaustanlands síðdegis. Hiti breytist lítið.

Á sunnudag: Austlæg átt og slydda, rigning eða snjókoma norðan heiða fram eftir degi, en úrkomulítið syðra. Hiti 0 til 7 stig, mildast syðst.

Á mánudag: Vestlæg átt, skýjað og sums staðar lítilsháttar rigning eða slydda. Áfram svalt í veðri.

Á þriðjudag: Suðvestanátt og súld eða rigning, fyrst vestanlands, en þurrt á Austur- og Suðausturlandi. Heldur hlýnandi.

Á miðvikudag: Breytileg átt og rigning með köflum.