Að nálgast starfs­mann sem líður illa, er reiður eða leiður

Þó þurfum við að mæta til vinnu. Erum kannski leið, reið eða með áhyggjur af einhverju heima fyrir. Eða að upplifa reiði, leiða eða aðra vanlíðan út af einhverju í vinnunni.

Í flestum tilfellum sést á okkur þegar líðanin er ekki góð. Sérstaklega í vinnunni, enda vinnuvikan drjúgur tími af okkar lífi almennt. Þegar svo er, kemur oft upp sú staða að vinnufélagar og yfirmaður velta fyrir sér hvað sé réttast að gera.

Á að nálgast starfsmanninn og ræða hvað sé að?

Eða á að bíða eftir því að málin lagist?

Í ágætri grein Harvard Business Review er mælt með því að yfirmaður láti sig málið varða. Enda hefur vanlíðan oftast áhrif á ýmiss atriði í vinnunni. Allt frá samskiptum yfir í afköst og framleiðni.

Samkvæmt rannsóknum, er það hins vegar betra að yfirmaður nálgist starfsmann sem augljóslega er í vanlíðan. Skiptir þá engu hvort sú vanlíðan er reiði, leiði eða annað.

Spurningin er bara: Hvenær og hvernig er best að gera það?

Áður en við förum í góðu ráðin er ágætt að benda á, að samkvæmt fyrrnefndri grein, eru það einmitt góðir stjórnendur og leiðtogar sem átta sig á því þegar starfsfólki líður illa og láta sig málin varða.

Þá er ágætt að benda á, að þótt yfirmaður láti sig málin varða og nálgist starfsmann sem er í vanlíðan, er ekki þar með sagt að viðkomandi sé að gefa væntingar um að hann/hún muni leysa málin.

Einfaldur leiðarvísir, samkvæmt grein, er sem hér segir:

Byrjaðu á því að meta aðstæður og líðan starfsmannsins, áður en þú býður fram aðstoð eða opnar fyrir samtal.

Hafðu síðan tvennt að leiðarljósi:

• Ef starfsmaðurinn er í það miklu uppnámi eða vanlíðan að viðkomandi getur ekki unnið, er gott að meta aðstæðurnar strax, átta sig á því hvaða tilfinningar eru ríkjandi hjá starfsmanni og bjóða síðan fram aðstoð.

• Ef starfsmaðurinn getur unnið þrátt fyrir vanlíðan, gerir stjórnandinn í raun það sama: Metur aðstæður og hvaða tilfinningar eða líðan eru ríkjandi hjá starfsmanni, en bíður með að bjóða fram aðstoð sína. Ef og þegar það móment er rétt, opnar stjórnandinn á samtal með því að spyrja viðkomandi hvernig honum/henni líði.