Rekinn tveimur dögum eftir bikarmeistaratitilinn

Juventus vann 1-0 sigur gegn Atalanta í úrslitum ítalska bikarsins, en Allegri fékk að líta beint rautt spjald í uppbótartíma leiksins fyrir að nöldra í dómurum leiksins. Þjálfarinn brást hinn versti við og í bræði sinni byrjaði hann að afklæðast á hliðarlínunni.

Hann fór fyrst úr jakkanum og henti honum niður. Allegri reif svo af sér bindið þegar hann gekk af velli. Loks byrjaði hann að hneppa frá skyrtunni sinni og var orðinn ber niður á maga þegar hann hætti loks.

Juventus hefur nú sent frá sér tilkynningu þess efnis að Allegri hafi verið leystur undan skyldum sínum sem þjálfari liðsins.

„Uppsögnin kemur í kjölfar ákveðinnar hegðunnar í og eftir úrslitaleik ítölsku bikarkeppninnar sem félaginnu þykir ekki eiga við gildi Juventus og þeirrar hegðunnar sem þeir sem eru í forsvari fyrir félagið eiga að standa fyrir,“ segir meðal annars í tilkynningu Juventus.