Suð­vest­læg átt og skúrir eða slyddu­él

Í hugleiðingum veðurfræðings á vef Veðurstofunnar segir að reikna megi með golu eða kalda og skúrum eða slydduéljum. Þó verður þurrt að kalla suðaustan- og austanlands fram undir kvöld

Gera má ráð fyrir að hiti verði á bilinu þrjú til tíu stig að deginum. Norðlægari vindur í kvöld og léttir til á Suðvesturlandi.

„Norðlæg átt 5-13 m/s á morgun. Dálítil él um landið norðanvert og hiti 0 til 5 stig, en bjart með köflum sunnan heiða og talsvert mildara yfir daginn. Þó má búast einhverjum skúrum á Suðausturlandi annað kvöld.

Á sunnudag er útlit fyrir að hægfara lægð verði skammt suður af landinu. Áttin verður því austlæg, yfirleitt kaldi eða strekkingur en hvassviðri syðst. Austanáttinni fylgir rigning með köflum sunnanlands, en dálítil slydda eða jafnvel snjókoma á Norðaustur- og Austurlandi. Svalt í veðri. Síðdegis bætir í úrkomu á austanverðu landinu, þar má búast við hríð á fjallvegum og þeir sem hyggja á ferðalög eru hvattir til að fylgjast með veðurspám,“ segir á vef Veðurstofunnar.

Veðurhorfur á landinu næstu daga

Á laugardag: Norðlæg átt 5-13 m/s. Dálítil él um landið norðanvert og hiti 0 til 5 stig. Bjart með köflum sunnan heiða og hiti að 10 stigum yfir daginn, en stöku skúrir á Suðausturlandi undir kvöld.

Á sunnudag (hvítasunnudagur): Gengur í austan 8-15, en 15-23 syðst á landinu síðdegis. Úrkomulítið á Norðvesturlandi, annars rigning með köflum, en dálítil slydda norðaustantil. Hiti 1 til 8 stig. Rigning eða slydda víðast hvar um kvöldið.

Á mánudag (annar í hvítasunnu): Suðaustan og austan 5-13, en hvassara við norðurströndina. Víða rigning, en dregur úr vætu vestanlands eftir hádegi. Hiti 2 til 10 stig.

Á þriðjudag og miðvikudag: Suðlæg eða breytileg átt og víða dálítil væta. Hiti 4 til 11 stig

Á fimmtudag: Suðvestlæg eða breytileg átt og skúrir. Hiti breytist lítið.