Beina til landsins hlýju og röku lofti að sunnan

Á vef Veðurstofunnar segir að það gangi á með sunnanstrekkingi eða allhvössum vindum og vætu með köflum, en helst að mestu þurru og björtu á Norður- og Austurlandi.

Fram kemur að það verði sunnan og suðaustan tíu til átján metrar á sekúndu þar sem hvassast verður vestantil.

Fremur hlýtt í veðri á landinu, ekki síst fyrir norðan þar sem hnjúkaþeys gætir. Má reikna með hita fimm til tólf stigum að deginum.

Veðurhorfur á landinu næstu daga

Á miðvikudag: Suðaustlæg átt, 10-18 m/s, hvassast í vindstrengjum vestantil. Víða lítilsháttar væta og hiti 3 til 8 stig, en bjartviðri og hiti kringum frostmark á Norður- og Austurlandi.

Á fimmtudag: Sunnan- og suðvestanátt, yfirleitt 10-15 m/s og rigning, en hægara og þurrt um landið norðaustanvert. Hlýnandi veður.

Á föstudag: Vestlæg átt og stöku skúrir eða slydduél, en þurrt að kalla eystra, en norðlægari norðantil um kvöldið og kólnar í veðri.

Á laugardag: Norðlæg átt og dálítil él á víð og dreif. Frost víða 0 til 10 stig, kaldast norðaustanlands.

Á sunnudag: Vestlæg eða breytileg átt og bjartviðri en snjókoma vestantil seinnipartinn. Talsvert frost um land allt.

Á mánudag: Útlit fyrir norðanátt með snjókomu eða él víða um land og hörkufrost.