Víðast lítils­háttar úr­koma í dag og hvessir annað kvöld

Í hugleiðingum veðurfræðings á vef Veðurstofunnar segir að það verði bjart með köflum og þurrt að mestu á Norðaustur- og Austurlandi. Gera má ráð fyrir dálitlum éljum suðvestanlands og að frost á landinu verði á bilinu núll til fimm stig. Allvíða verður frostlaust við ströndina.

„Á morgun, laugardag verður hæg breytilega átt og þurrt að kalla á landinu en vaxandi suðaustanátt um landið vestanvert um kvöldið.

Frá og með sunnudegi og fram eftir næstu viku er útlit fyrir hlýjar suðlægar áttir en vætu um landið sunnan- og vestanvert, en lengst af þurrt og bjart fyrr norðan og austan.

Hlýindin og vætan mun án efa vinna vel á svellbunkum og sköflum, sem valdið hafa vandræðum undanfarið,“ segir á vef Veðurstofunnar.

Veðurhorfur á landinu næstu daga

Á laugardag: Yfirleitt hæg suðlæg átt og bjartviðri, en suðaustankaldi, skýjað og úrkomulítið vestantil um kvöldið. Frost víða 0 til 10 stig, en frostlaust vestast.

Á sunnudag: Sunnan og suðaustan 8-15 m/s, hvassast vestantil. Víða lítilsháttar væta, en bjartviðri á Norður- og Austurlandi. Hiti 0 til 8 stig, hlýjast syðst.

Á mánudag, þriðjudag, miðvikudag og fimmtudag: Ákveðnar sunnan- og suðaustanáttir, rigning eða súld með köflum og fremur hlýtt, en lengst af þurrt og bjart norðaustantil.