Væta um sunnan- og vestan­vert landið

Í hugleiðingum veðurfræðings segir að það fari að rigna á vestanverðu landinu og þegar líður á daginn snúist þar í vestlæga átt, kólni og þá komi slydda líka við sögu, jafnvel snjókoma á heiðum.

„Því má reikna með versnandi aksturskilyrðum á fjallvegum og eru ökumenn hvattir til að kynna sér vel veður og færð áður en lagt er af stað. Dregur úr vindi vestast með stöku éljum í kvöld. Hiti 0 til 5 stig.

Á morgun verður veðrið mismundi eftir landshlutum. Suðaustan 8-13 m/s austantil en annars hægari. Allvíða slydda eða snjókoma en rigning á Suðausturlandi og úrkomulítið norðaustantil. Stöku él vestanlands. Hiti 0 til 6 stig, hlýjast syðst en nálægt frostmarki norðvestantil.

Á miðvikudag verður austlæg átt 5-10 m/s og víða bjart með köflum, en skýjað og dálítil rigning eða snjókoma suðaustantil. Hiti um eða undir frostmarki en 0 til 4 stig sunnanlands,“ segir á vef Veðurstofunnar.

Veðurhorfur á landinu næstu daga

Á þriðjudag: Suðaustlæg átt 8-13 m/s en hægari vestantil. Víða snjókoma eða slydda en rigning á Suðausturlandi og úrkomuminna norðaustantil. Stöku él eða slydduél á vestanverðu landinu. Hiti víða 0 til 5 stig, en kringum frostmark norðvestantil.

Á miðvikudag: Austlæg átt 5-13 og dálítil slydda eða rigning suðaustantil, bjartviðri á Vesturlandi, en annars él. Frost víða 0 til 5 stig, en frostlaust við sjávarsíðuna.

Á fimmtudag: Norðlæg átt 5-13 og él, en bjartviðri sunnan heiða. Frost 0 til 7 stig.

Á föstudag (fullveldisdagurinn): Norðlæg átt og él norðan- og austanlands, annars víða bjartviðri en líkur á snjókomu sunnanlands. Harðnandi frost.

Á laugardag: Norðaustlæg átt með dálítlum éljum, en bjartviðri sunnan heiða. Talsvert frost um allt land.

Á sunnudag: Útlit fyrir suðaustlæga átt. Snjókoma eða slydda með hlýnandi veðri um sunnan- og vestanvert landið og síðar rigning en þurrt og kalt norðaustantil.