Svalast norðan­til en mildara fyrir sunnan

Veðurstofan spáir austlægri átt í dag, átta til fimmtán metrum á sekúndu þar sem hvassast á Vestfjörðum. Gert er ráð fyrir hita á bilinu þremur til ellefu stigum þar sem svalast verður á norðanverðu landinu, en mildara syðra.

„Lægðasvæðin fjarlægjast er nær dregur helgi og hæð færist yfir landið, en lægir því, léttir til og kólnar í veðri.

Á sunnudag kemur lægð vestan frá Grænlandi og gengur í suðvestanstrekking með rigningu sunnan- og vestanlands og hlýnar heldur í bili,“ segir í hugleiðingum veðurfræðings.

Veðurhorfur á landinu næstu daga

Á fimmtudag: Austlæg átt, víða 5-13 m/s, en hvessir heldur með suðuströndinni um kvöldið. Lítilsháttar rigning á Suður- og Vesturlandi, en annars stöku él. Hiti 0 til 7 stig, mildast sunnantil.

Á föstudag: Austan- og norðaustan 8-15 m/s, hvassast við suðurströndina. Skýjað að mestu, en stöku skúrir eða él á víð og dreif. Hiti 0 til 5 stig.

Á laugardag: Útlit fyrir suðvestlæga vinda, strekking norðvestantil, en annars mun hægari. Skýjað með köflum og úrkomulaust að kalla, en stöku skúrir vestanlands. Hiti 1 til 6 stig að deginum.

Á sunnudag og mánudag: Líklega suðvestanstrekkingur með rigningu, en þurrviðri fyrir austan. Hlýnar í bili.

Á þriðjudag: Gengur væntanlega í norðanhvassviðri með slyddu eða rigningu, en léttir til syðra og kólnar í veðri.