Nokkuð milt veður en þó með skúrum

Búast má við nokkuð mildu veðri í dag. Samkvæmt hugleiðingum veðurfræðings Veðurtofunnar verður suðaustan gola eða kaldi. Þó verða einhverjir skúrir sunnanlands og rigning við austurströndina, en úrkomulítið á Norðurlandi. Hiti verður á bilinu átta til 15 stig, hlýjast verður á Austurlandi.

Á morgun hvessir nokkuð norðantil á landinu en þá verður norðaustlæg átt. Búast má við talsverðri rigningu norðan- og austanlands, en að mestu þurru suðvestantil og þar ætti að sjá vel til sólar. Hiti verður á bilinu sjö til þrettán stig.

Nánar á vef Veðurstofunnar. 

Veðurhorfur á landinu næstu daga

Á mánudag:

Norðaustan 10-18 m/s við norðurströndina og á Vestfjörðum, en hægari í öðrum landshlutum. Víða talsverð rigning norðan- og austanlands, en úrkomulítið á Suðvesturlandi. Hiti 7 til 13 stig.

Á þriðjudag:

Norðaustan 13-20 og rigning, einkum norðaustan- og austanlands. Hiti 5 til 10 stig.

Á miðvikudag:

Ákveðin norðaustanátt og dálítil væta, en þurrt á Suður- og Vesturlandi. Hiti 4 til 11 stig, mildast við suðurströndina.

Á fimmtudag og föstudag:

Norðlæg átt og dálítil rigning eða slydda norðan- og austanlands, en bjartviðri suðvestantil. Hiti 1 til 8 stig, mildast syðst.

Á laugardag (haustjafndægur):

Norðaustlæg átt og úrkomulítið.