Þorleifur kom inn af bekknum og skoraði tvö

Amine Bassi kom heimamönnum í Houston yfir strax á þriðju mínútu áður en Corey Baird bætti öðru marki liðsins við aðeins tveimur mínútum síðar.

Carlos Akapo minnkaði þó muninn fyrir gestina stuttu fyrir hlé og staðan var því 2-1 þegar flautað var til hálfleiks og liðin gengu til búningsherbergja.

Þorleifur Úlfarsson kom svo inn á sem varamaður á 74. mínútu leiksins og hann átti heldur betur eftir að láta til sín taka. Hann sá til þess að Houston endurheimti tveggja marka forskot sitt aðeins þremur mínútum eftir innkomuna og bætti svo öðru marki sínu og fjórða marki liðsins við á 89. mínútu.

Lokatölur urðu því 4-1, Houston í vil, og liðið situr nú í fjórða sæti Vesturdeildarinnar með 27 stig eftir 18 leiki, fimm stigum á eftir toppliði Los Angeles FC. San Jose Earthquakes situr í fimmta sæti, einnig með 27 stig.

Þá kom Dagur Dan Þórhallsson inn af varamannabekknum fyrir Orlando City er liðið gerði 2-2 jafntefli gegn Philadelphia Union í Austurdeildinni.