Laxinn kominn upp á efri svæðin í Kjós

Það er vel þekkt að þegar til dæmis Stóra Laxá opnar á svæði IV eru að veiðast lúsugir laxar þar og vegalengdin sem laxinn þarf að fara frá ósum Ölfusár og upp í Stóru Laxá er líklega um 120-130 kílómetrar og það er alveg glettilega mikið af erfiðum farartálmum á leiðinni. Í Jöklu hafa veiðst lúsugir laxar langt upp í dal, í Víðidalsá fékk veiðifélagi minn einu sinni lúsugan lax í Laxapolli í Fitjá og sá hinn sami maður landaði lúsugum laxi með mér eitt árið í Útfallinu í Soginu sem er efsti veiðistaður. 

Laxinn fer líklega nokkuð auðveldlega með 100 km leið á tveimur dögum sem sýnir hvað þessi magnaða skepna er öflug. Myndin með fréttinni sýnir nýgengin lax en við sjáum ekki hvort hann er lúsugur eða ekki en þessi mynd er tekin á svæði IV í Laxá í Kjós í morgun, líklega í Pokafossi og að sjá bjartan og fallegan lax í þessu færi gerir ekki annað en að ýta undir spennuna fyrir næsta veiðitúr.