Sá heitir Jorg Schmadtke og samkvæmt enskum fjölmiðlum verður hann ráðinn íþróttastjóri Liverpool í vikunni. Hann tekur við starfinu af Julian Ward.
Hinn þýski Schmadtke fékk góð meðmæli frá landa sínum, Jürgen Klopp, knattspyrnustjóra Liverpool.
Schmadtke ætlaði að hætta að vinna eftir að hann yfirgaf Wolfsburg í byrjun árs en stóðst ekki freistinguna að starfa hjá jafn stóru félagi og Liverpool.
Búist er við talsverðum breytingum á leikmannahópi Liverpool í sumar svo Schmadtke mun væntanlega hafa nóg að gera fyrstu mánuðina í nýja starfinu.
Schmadtke var markvörður og lék með Fortuna Düsselforf, Freiburg og Bayer Leverkusen. Hann starfaði síðan sem íþróttastjóri hjá Alamania Aachen, Hannover 96, Köln og Wolfsburg.
