Besta spáin 2023: Miklar breytingar í Keflavík

Keflavík hefur endað í 8.sæti deildarinnar undanfarin tvö ár og verið fjórum stigum frá falli en vill eflaust ná betri árangri í ár. Til þess þurfa nýjir leikmenn að standa sig frábærlega.

Venju samkvæmt spáir íþróttadeild Vísis og Stöðvar 2 Sports fyrir um gengi liðanna í Bestu deild kvenna fyrir mótið. Keppni í deildinni hefst þann 25. apríl með þremur leikjum. Fyrstu umferðinni lýkur svo 26. apríl með tveimur leikjum.

Íþróttadeild Vísis og Stöðvar 2 Sports spáir því að Keflavík endi í 7. sæti Bestu deildar kvenna í sumar.

Keflavík

Ár í deildinni: Þriðja tímabilið í röð í efstu deild
Besti árangur: 3.-4. sæti (1975)
Best í bikar: Tvisvar í bikarúrslit (Síðast 2007)
Sæti í fyrra: 8. sæti í efstu deild
Þjálfari: Jonathan Glenn (1. tímabil)
Markahæst í fyrra: Ana Paula Santos, 5 mörk

Síðustu tvö ár hefur Keflavík spilað í efstu deild eftir að hafa komist upp nokkuð örugglega árið 2010. Bæði tímabilin í efstu deild hefur liðið endað í 8.sæti, fjórum stigum frá falli. Í fyrra með 16 stig, tveimur stigum minna en árið áður. Þrátt fyrir stöðugleika vill nýr þjálfari liðsins eflaust færa liðið ofar í töflunni.

Keflavík skoraði ekki mikið í fyrra, einungis 21 mark en fékk á sig 39 sem er einfaldlega allt of mikið. Jonathan Glenn tók við eftir síðasta tímabil og hefur því verk að vinna til að snúa markahlutföllunum við. Í vetur gekk það illa og liðið skoraði einungis fjögur mörk og fékk á sig átján í riðli sínum í Lengjubikarnum og endaði í 5. sæti af sex liðum.

Keflavík mætir Tindastól í 1. umferð Bestu deildarinnar.Vísir/Hulda Margrét

Liðið og leikmenn

Miklar breytingar hafa orðið á leikmannahópnum frá síðustu leiktíð. Níu leikmenn bætast við hópinn en fimm yfirgefa liðið. Óvíst er hvaða áhrif þessar miklu breytingar hafa á liðið.

Búist er við miklu af hinni 29 ára gömlu Veru Varis sem mun verja mark Keflavíkur í sumar en hún tekur við af Samönthu Murphy sem var frábær í markinu í fyrra. Varis þarf því að hafa sig alla við til að fylla upp í skarðið. Hún varð finnskur meistari með KuPS síðasta sumar og fékk einungis á sig níu mörk í 23 leikjum.

Miklar vonir eru bundnar við að Linli Tu fylli skarð Önu Santos í framherjastöðunni. Linli Tu skoraði 16 mörk í 17 leikjum fyrir sameiginlegt lið Hattar, KFF og Leiknis Fáskrúðsfjarðar í Lengjudeildinni í fyrra en Ana Santos skoraði sex mörk í 18 leikjum í Bestu deildinni í fyrra.

Komnar:

Eva Lind Daníelsdóttir frá Grindavík
Linli Tu frá Fjarðabyggð/Hetti/Leikni
Madison Wolfbauer frá ÍBV
Sandra Voitane frá ÍBV
Vera Varis frá Finnlandi
Ástrós Lind Þórðardóttir frá ÍR (var á láni)
Þórhildur Ólafsdóttir frá ÍBV
Mikaela Nótt Pétursdóttir frá Breiðabliki (á láni)
Júlía Ruth Thasaphong frá Grindavík

Farnar:

Ana Paula Santos Silva til Finnlands
Samantha Leshnak Murphy til Piteå
Jóhanna Lind Stefánsdóttir í Víking
Elín Helena Karlsdóttir í Breiðablik (var á láni)
Snædís María Jörundsdóttir í Stjörnuna (var á láni)

Til að gengi Keflavíkur verði sem best í sumar skiptir miklu máli að Varis og Linli spili frábærlega á sitthvorum enda vallarins.

Þrír leikmenn koma með Jonathan Glenn frá ÍBV. Það eru Madison Wolfbauer, Sandra Voitane og Þórhildur Ólafsdóttir.

Wolfbauer kemur að öllum líkindum til með að styrkja liðið mikið á miðjunni en hún spilaði 8 leiki með ÍBV á síðasta tímabili.

Voitane er ætlað að binda saman varnarleikinn en hún kemur líka frá ÍBV og spilaði 16 leiki síðasta sumar.

Þórhildur kemur einnig frá ÍBV en hún er með gríðarlega leikreynslu, hefur spilað yfir 100 leiki í meistaraflokksbolta.

Fjórir aðrir leikmenn gengu til liðs við Keflavík fyrir komandi tímabil. Eva Lind Daníelsdóttir er 24 ára framherji sem kom frá Grindavík, hún hefur spilað í Keflavík og Grindavík til skiptis frá 2019. Ástrós Lind Þórðardóttir er 32 ára miðjumaður sem kom frá ÍR. Mikaela Nótt Pétursdóttir er 19 ára varnarmaður og kom frá Breiðablik. Júlía Ruth Thasaphong er tvítugur miðjumaður og kom frá Grindavík.

Lykilmenn Keflavíkur