Óðagot hjá Google þar sem unnið er að nýrri leitarvél

Gervigreindir eins og ChatGPT og Bing hjá Microsoft eru stærsta ógnin sem Google hefur staðið frammi fyrir í 25 ár, samkvæmt frétt New York Times.

Þar kemur fram að starfsmönnum Google hafi brugðið mjög í síðasta mánuði þegar fregnir bárust af því að forsvarsmenn Samsung voru að velta vöngum yfir því að gera Bing, leitarvél Microsoft, að staðalleitarvél snjallsíma fyrirtækisins, í stað Google.

Samsung hefur notað Google sem staðalleitarvél um árabil en það að Bing hefur verið tengd við ChatGPT tæknina hefur vakið mikla athygli og gert Bing mun áhugaverðari en áður innan tæknigeirans.

NYT vísar í samskipti milli stjórnenda Google og segir ofsahræðslu hafa myndast innan veggja fyrirtækisins vegna fregnanna frá Suður-Kóreu. Google fái um þrjá milljarða dala á ári frá Samsung og sambærilegur tuttugu milljarða samningur sé í húfi hjá Apple en hann rennur út á þessu ári.

Sjá einnig: Tólf þúsund manns sagt upp hjá Alphabet

Gervigreind með innreið á leitarvélamarkaðinn

Gervigreindin ChatGPT hefur notið mikilla vinsælda á internetinu undanfarna mánuði og hefur meðal annars verið látin skrifa heilu ritgerðirnar og semja sögur um hin ýmsu málefni og fólk. ChatGPT byggir á tækni fyrirtækisins OpenAI sem Microsoft hefur fjárfest í fyrir milljarð dala.

Umrædd tækni er talin henta leitarvélum einstaklega vel þar sem hægt er að nota hana til að fá ítarleg svör við ítarlegum spurningum í stað þess að leita eftir nokkrum stikkorðum.

Fregnir bárust af því í byrjun árs að starfsmenn Microsoft hefðu í nokkra mánuði unnið að því að innleiða gervigreindartæknina inn í hugbúnað fyrirtækisins. Þar á meðal inn í leitarvélina Bing og kveiktu þær fregnir á viðvörunarbjöllum innan veggja Google fyrr á þessu ári.

Forsvarsmenn fyrirtækisins voru sagðir sjá að mögulega sé komið að því að þróun gervigreindar gæti leitt til mikilla sviptinga á sviði leitarvéla á netinu og kollvarpað rekstrarumhverfi fyrirtækisins.

Þá opinberuðu starfsmenn Google eigin gervigreind sem kallast Bard en hún hefur ekki vakið jafn mikla lukku og Bing og ChatGPT.

Meðal þeirra breytinga sem unnið er að hjá Google til skamms tíma er að gera Google leitarvélina meira tengda notendum svo hún og Bard eða önnur gervigreind geti reynt að sjá fyrir þarfir notenda, samkvæmt frétt NYT. Eins og segir í fréttinni hafa milljarðar manna notað Google sem aðalleitarvél sína um árabil og merki leitarvélarinnar og hönnun síðunnar er þekkt um heiminn allan.

Breytingar á leitarvélinni gæti haft miklar afleiðingar.

NYT segir einnig að þróun nýrrar leitarvélar sé enn skammt á veg komin og ekki sé hægt að segja að svo stöddu hvenær hún yrði opinberuð. Þeirri leitarvél er ætlað að læra á notendur og spjalla við þá, eins og einhvers konar aðstoðarmaður.