Norð­menn vísa fimm­tán rúss­neskum sendi­ráðs­starfs­mönnum úr landi

Frá þessu segir í tilkynningu frá norska utanríkisráðuneytinu. Þar segir að starfsmennirnir séu í raun starfsmenn rússneskrar leyniþjónustu.

Starfsmennirnir þurfa að yfirgefa Noreg sem fyrst og segir í tilkynningunni að norsk yfirvöld muni ekki veita starfsmönnum rússneskra yfirvalda sem starfa við leyniþjónustu vegabréfsáritun.

Ákvörðun norskra stjórnvalda er sögð byggja á þeirri nýju öryggispólitísku stöðu sem uppi sé sem hafi leitt til aukinnar ógnar frá Rússlandi.

Utanríkisráðherrann Anniken Huitfeldt segir að Norðmenn muni ekki heimila veru rússneskra leyniþjónustumanna í Noregi sem séu þar í skjóli stöðu sem erindrekar, að því er segir í frétt NRK.

Norsk stjórnvöld eru sögð hafa lengi fylgst með umræddum fimmtán sendiráðsstarfsmönnum. Norðmenn vísuðu þremur rússneskum leyniþjónustumönnum úr landi í apríl á síðasta ári, nokkrum vikum eftir upphaf innrásar Rússa í Úkraínu.