Víða lítils­háttar él og frost að sex­tán stigum

Í hugleiðingum veðurfræðings segir að víða verði lítilsháttar él, en að það létti til suðvestanlands með morgninum.

Frost verður á bilinu tvö til sextán stig og verður kaldast í innsveitum á Norðurlandi.

„Norðlægari vindur á morgun, gola, kaldi eða strekkingur og léttskýjað, en stöku él á Norður- og Austurlandi. Það kólnar enn frekar, frost yfirleitt á bilinu 5 til 20 stig, kaldast í lægðum í landslagi.

Á sunnudag er svo útlit fyrir norðlæga átt og áframhaldandi kulda, en yfirleitt þurrt veður,“ segir á vef Veðurstofunnar.

Veðurhorfur á landinu næstu daga

Á laugardag: Norðaustan og norðan 5-13 m/s og léttskýjað, en lítilsháttar él á Norður- og Austurlandi. Frost 5 til 20 stig.

Á sunnudag: Norðlæg átt 3-10, en 10-15 austast á landinu. Skýjað með köflum á Norður- og Austurlandi og líkur á stöku éljum, annars þurrt og bjart. Hiti breytist lítið.

Á mánudag: Gengur í norðan 8-15 með éljum, en yfirleitt þurrt sunnan heiða. Dregur heldur úr frosti.

Á þriðjudag: Norðlæg átt og él, en þurrt sunnanlands. Frost 3 til 12 stig.

Á miðvikudag: Breytileg átt með úrkomulitlu og köldu veðri. Snýst í vaxandi suðaustanátt síðdegis og þykknar upp sunnan- og vestanlands.

Á fimmtudag: Suðaustlæg eða breytileg átt og rigning eða slydda víða um land. Milt í veðri.