Frost að tíu stigum og enn kaldara á morgun

Í hugleiðingum veðurfræðings á vef Veðurstofunnar segir að frost verði á bilinu núll til tíu stig.

Reikna má með svipuðu veðri á morgun. „Norðaustan og austan 5-15 m/s og víða dálítil él, en yfirleitt þurrt suðvestanlands. Það kólnar enn frekar, frost víða 2 til 15 stig, kaldast í innsveitum á Norðurlandi.

Á laugardag er svo útlit fyrir áframhaldandi norðaustlæga átt með talsverðu frosti um mest allt land.“

Veðurhorfur á landinu næstu daga

Á föstudag: Norðaustan og austan 5-15 m/s, hvassast syðst. Víða dálítil él, en yfirleitt þurrt um landið suðvestanvert. Frost 3 til 17 stig, kaldast í innsveitum norðanlands.

Á laugardag: Norðlæg átt 5-13 og léttskýjað, en lítilsháttar él norðan- og austanlands. Frost 5 til 20 stig.

Á sunnudag: Breytileg átt 3-10 og víða bjartviðri, en gengur í austan 8-15 vestantil eftir hádegi með éljum. Áfram kalt í veðri.

Á mánudag: Norðaustlæg átt og allvíða él. Talsvert frost.

Á þriðjudag: Köld norðlæg átt og dálítil él, en þurrt um landið sunnanvert.

Á miðvikudag: Breytileg átt og snjókoma með köflum. Dregur úr frosti.