Ronaldo á leið í læknisskoðun í Sádi-Arabíu

Ronaldo er laus allra mála eftir að Manchester United sleit samningum við kappann í kjölfar umdeilds viðtals hans við breska fjölmiðlamanninn Piers Morgan. Ronaldo talaði þar illa um fjölmarga hjá United og víðar.

Vöngum hefur verið velt yfir framtíð hans, en Ronaldo verður 39 ára í febrúar næst komandi. Eftir að hafa gengið illa að komast að hjá félagi í Meistaradeild Evrópu er allt útlit fyrir að hann muni gera risasamning í Sádi-Arabíu og klára feril sinn þar.

Bandaríski miðillinn CBS greinir frá því að Ronaldo sé á leið til Sádi-Arabíu ásamt fylgdarliði sínu til að undirgangast læknisskoðun fyrir skipti sín til Al-Nassr.

Spænski miðillinn Marca greindi frá því fyrir jól að Ronaldo myndi spila í tvö og hálft ár fyrir félagið en vera bundinn Sádum í sjö ár. Sádar vilji nýta ímynd Ronaldo og gera hann að sendiherra landsins er það sækist eftir gestgjafarétti HM karla í fótbolta árið 2030 ásamt Egyptalandi og Grikklandi, auk þess sem Sádar vilja halda Ólympíuleikana árið 2036.

Verði af því mun Ronaldo verða andstæðingur heimalands síns, Portúgals, sem sækist einnig eftir HM 2030 ásamt Spáni og Úkraínu.