Osimhen sá um Rómverja

Í kvöld fengu lærisveinar Luciano Spalletti verðugt verkefni í hendurnar þegar þeir heimsóttu AS Roma sem hafði unnið þrjá deildarleiki í röð þegar kom að leik kvöldsins.

Hart var barist og lítið um opin marktækifæri stærstan hluta leiksins og stefndi lengi vel í markalaust jafntefli.

Allt þar til á 80.mínútu þegar Victor Osimhen slapp um stundarsakir úr strangri gæslu Chris Smalling. Nígeríski sóknarmaðurinn nýtti sér það og skoraði afar laglegt mark framhjá Rui Patricio í marki Rómverja.

Ekki tókst lærisveinum Jose Mourinho að finna jöfnunarmark á lokakafla leiksins og lokatölur þvi 0-1 fyrir Napoli sem er áfram taplaust á toppi deildarinnar og hefur þriggja stiga forystu á AC Milan.