Skoraði bæði fyrsta og síðasta heimavallarmark Orlando á tímabilinu

Gunnhildur Yrsa kom Orlando í 2-0 á 68. mínútu með sínu öðru deildarmarki á tímabilinu. Hún skallaði þá fyrirgjöf frá Courtney Petersen í netið.

Það fyrra kom í 2-2 jafntefli við Kansas City Current í 3. umferð deildarinnar. Það var fyrsta mark Orlando á heimavelli á tímabilinu og Gunnhildur Yrsa skoraði einnig það síðasta.

Átta mínútum eftir mark Gunnhildar Yrsu. minnkuðu gestirnir muninn og þremur mínútum fyrir leikslok jöfnuðu þeir. Lokatölur 2-2.

Orlando er í 9. sæti af fjórtán liðum og kemst ekki ofar í lokaumferðinni sem fer fram um næstu helgi.

Gunnhildur Yrsa er á sínu öðru tímabili hjá Orlando. Hún lék áður með Utah Royals. Garðbæingurinn hefur alls leikið 87 leiki í bandarísku deildinni og skorað fimm mörk.

Orlando sækir Megan Rapinoe og stöllur hennar í Reign heim í lokaumferð deildarinnar.