Fjölskylduhátíð á Pop up í Laugardal

Netgíró 8. september 2022 13:50

Eyrún Anna Tryggvadóttir og Olga Helena Ólafsdóttir eigendur Von verslun, halda Haust Pop up í Laugardal um helgina. Yfir 70 fyrirtæki og verslanir taka þátt og verða hoppukastalar og matarvagnar á staðnum.

Pop up markaður fer fram undir KSÍ stúkunni Laugardal um helgina og á heimapopup.is. Tugir spennandi verslana bjóða varning og matarvagnar og leiktæki verða á staðnum. Þetta er í átjánda sinn sem markaðurinn er haldinn og hefur farið stækkandi með hverju árinu.

„Þetta er orðið að heilli fjölskylduhátíð með hoppukastala, tívolítækjum, ís- og matarvögnum og Latibær verður einnig á staðnum. Þarna verða yfir 70 fyrirtæki bæði stór og smá, ný og rótgróin og vöruúrvalið spannar meðal annars heimils- og barnavörur, lífsstílsvörur, hönnun og fleira. Í ár verður markaðurinn einnig á netinu á heimapopup.is fyrir þau fyrirtæki sem eru til dæmis staðsett úti á landi eða eru þegar með verslunarhúsnæði en vilja taka þátt í markaðnum,“ segir Eyrún Anna Tryggvadóttir en hún stendur á bak við markaðinn ásamt Olgu Helenu Ólafsdóttur. Hún segir hægt að gera frábær kaup um helgina.

„Það verða allar verslanirnar með tilboð og afslætti. Við erum einnig í samstarfi við Netgíró og þau ætla að endurgreiða 20 viðskiptavinum sem greiða með Netgíró á Haust pop up um helgina.“

Pop up orðinn hluti af markaðsáætlunum

Saman reka þær Eyrún og Olga barnavöruverslunina Von og héldu fyrsta pop up markaðinn í tengslum við búðina fyrir nokkrum árum. Þær segja markaðinn sniðugt markaðstól fyrir verslanir.

„Hugmyndin snerist um að gefa netverslunum vettvang til að mæta með lagerinn og kynna sig fyrir viðskiptavinum. Pop up markaðurinn hefur síðan þá fest sig í sessi sem markaðstól og nú gera mörg fyrirtæki ráð fyrir þátttöku í sínum markaðsplönum. Það skilar sér að vera með þegar mörg fyrirtæki setja út sömu skilaboðin, að það verði eitthvað í gangi næstu helgi,“ segir Eyrún.

Markaðurinn fer fram milli klukkan 11 og 17, laugardag og sunnudag undir KSÍ stúkunni, Laugardal. Á facebook er hægt að sjá hvaða fyrirtæki taka þátt.