Glæsimark vandræðagemsans dugði ekki til hjá Guðlaugi og félögum

Guðlaugur Victor var í miðvarðarstöðunni hjá liðinu síðustu helgi þegar það þurfti að þola 6-0 tap fyrir toppliði Austurdeildarinnar, Philadelphia Union. Wayne Rooney, þjálfari D.C. breytti til og var með Guðlaug á miðjunni í nótt.

Eftir markalausan fyrri hálfleik í Atlanta í Georgíu fór síðari hálfleikurinn fjörlega af stað. Vandræðagemsinn Ravel Morrison, sem er fyrrum leikmaður Manchester United, kom D.C. yfir á 47. mínútu með frábæru skoti utan teigs.

Aðeins tveimur mínútum síðar jafnaði miðvörðurinn Alan Franco með skalla eftir hornspyrnu ungstirnisins Thiago Almada. Það var ekki löngu síðar, á 55. mínútu sem Ola Kamara endurnýjaði forystu gestanna með skallamarki eftir fyrirgjöf Chris Durkin.

Atlanta svaraði aftur á móti með tveimur mörkum. Josef Martínez jafnaði leikinn á 62. mínútu með öðru skallamarki heimamanna í leiknum og þriðja skallamark þeirra skoraði Juan Sanchez á 70. mínútu en það var jafnframt sigurmark leiksins.

Atlanta vann 3-2 sigur og D.C. United hefur nú tapað fjórum leikjum í röð í deildinni. Liðið vann fyrsta leik Wayne Rooney við stjórnvölin þann 31. júlí en hefur síðan tapað fimm leikjum og gert jafntefli í einum þeirra.

D.C. United er áfram á botni Austurdeildarinnar með 22 stig, átta á eftir Chicago Fire sem er næst fyrir ofan. Atlanta er þremur sætum fyrir ofan botnliðið, í því ellefta, með 33 stig.