Sel­fyssingar ekki tapað úti­leik í úr­slita­keppni í fjögur ár

Heimavöllurinn hefur verið að bregðast Selfossliðinu síðan þeir tryggðu sér Íslandsmeistaratitilinn en þeir hafa getað treyst á góða frammistöðu í útileikjunum.

Það var mikil spenna í leiknum í Krikanum í gær en gestirnir sýndu enn á ný hversu góðir þeir eru á útivelli.

Selfyssingar voru með frumkvæðið fram eftir leik en misstu leikinn í framlengingu. Það þurfti tvær framlengingar til að skera út um sigurvegara en Selfossliðið var miklu sterkara í seinni framlengingunni og vann fimm marka sigur, 38-33.

Selfossliðið hélt því áfram sigurgöngu sinni á útivöllum en liðið hefur unnið alla sjö útileiki sína í úrslitakeppni frá því í maí 2018.

Síðasta liðið til að vinna heimasigur á móti Selfossi í úrslitakeppni var lið FH í undanúrslitum 2018. FH tryggði sér þá oddaleik með 41-38 sigri í framlengdum fjórða leik liðanna.

Það eru því liðnir rúmir 47 mánuðir (1.444 dagar) frá síðasta tapleik Selfyssinga á útivelli í úrslitakeppni.

Á sama tíma hefur Selfossliðið aftur á móti tapað fjórum leikjum á heimavelli í úrslitakeppni. Þeir steinlágu í heimaleiknum í þessari seríu á móti FH og duttu út í fyrra eftir tap á móti Stjörnunni í seinni leik liðanna í átta liða úrslitum.

Eina tap Selfossliðsins í úrslitaeinvíginu 2019 kom einmitt á heimavelli á móti Haukum. Selfoss tryggði sér titilinn þá með sigri á heimavelli í fjórða leiknum.

Góðu fréttirnar fyrir Selfossliðið er kannski að næsti leikur er einmitt á útivelli því fyrsti leikurinn í undanúrslitaeinvíginu á móti Val er á Hlíðarenda á mánudagskvöldið.