Seðlabanki Íslands var fyrstur vestrænna seðlabanka til þess að hækka vexti í maí á síðasta ári eftir miklar lækkanir í upphafi faraldursins. Nú standa stýrivextir bankans í 2,75 prósentum og hafa því hækkað um 2 prósentur á síðustu 12 mánuðum. Bankinn á fullt í fangi með verðbólguna sem mældist 6,7 prósent í febrúar.
Ásgeir sagði að þrátt fyrir allt það umboð sem Seðlabankanum hefur verið fengið gæti hann ekki tryggt stöðugleika nema vinnumarkaðurinn gengi í takt.
„Annars er hætta á að við siglum inn í gömlu hringavitleysuna með víxlhækkunum launa og verðlags til tjóns fyrir alla. Enn verra væri að hringavitleysan endurspeglaðist í kröfum um að stýrivaxtahækkunum verði að mæta með launahækkunum,“ sagði Ásgeir.
„Spurningunni um hve mikið Seðlabankinn kunni að þurfa að hækka vexti til þess að viðhalda stöðugleika verður aðeins svarað í komandi heildarkjarasamningum í haust,“ sagði Ásgeir í ræðu sinni á fundinum.
Í ávarpi Katrínar sagði hún flesta sammála um að kaupmáttur hverrar krónu sem kemur inn á launareikninginn væri það sem skiptir máli.
„Lífskjörin ráðast hins vegar ekki aðeins af þeirri fjárhæð sem gefin er upp á launaseðli heldur svo ótal mörgum öðrum þáttum sem varða til að mynda uppbyggingu skattkerfis, stuðnings- og afkomutryggingakerfa, húsnæðismarkaðar og almannaþjónustu og hvernig þessir þættir spila saman,“ sagði Katrín.
Spurningunni um hve mikið Seðlabankinn kunni að þurfa að hækka vexti til þess að viðhalda stöðugleika verður aðeins svarað í komandi heildarkjarasamningum í haust
„Markmiðið er líkt og áður að styðja við samtalið og leita sameiginlegra lausna sem skila okkur aukinni velsæld og bættu samfélagi.“
Þá benti hún á að niðurstöður lífskjarakönnunar sem Hagstofan birti um miðjan mars sýndu almennt jákvæða þróun á síðastliðnu ári. Hlutfall heimila sem átti erfitt með ná endum saman árið 2021 hafi, þrátt fyrir áhrif farsóttar, verið hið lægsta sem mælst hefur í þessari könnun eða 24 prósent. Hlutfallið var yfir 40 prósent á árunum 2010 - 2015.
